काठमाडौँ, वैशाख २८ । इन्डियन प्रिमियर लिग (आईपीएल) अन्तर्गत आइतबार राति सम्पन्न अत्यन्तै रोमाञ्चक खेलमा रोयल च्यालेन्जर्स बैंगलुरु (आरसीबी) ले मुम्बई इन्डियन्सलाई २ विकेटले पराजित गर्दै महत्वपूर्ण जित दर्ता गरेको छ। रायपुरमा भएको प्रतिस्पर्धामा मुम्बईले दिएको १ सय ६७ रनको लक्ष्य बैंगलुरुले निर्धारित २० ओभरको अन्तिम बलमा ८ विकेट गुमाएर पूरा गर्यो।
बैंगलुरुको जितमा क्रुणाल पाण्ड्याले उत्कृष्ट अर्धशतकीय पारी खेल्दै ७३ रन बनाए। उनले टोलीलाई दबाबपूर्ण अवस्थाबाट जिततर्फ डोर्याउने क्रममा महत्वपूर्ण भूमिका निभाए। यस्तै, जकोब बेथेलले २७ रन, जितेश शर्माले १८ रन तथा देवदत्त पडिक्कलले १२ रनको योगदान दिए।
मुम्बईका बलर कोर्बिन बोशले घातक बलिङ गर्दै ४ विकेट लिए पनि टोलीलाई हारबाट जोगाउन सकेनन्।
यसअघि टस हारेर पहिले ब्याटिङ गरेको मुम्बई इन्डियन्सले निर्धारित २० ओभरमा ७ विकेट गुमाएर १ सय ६६ रन बनाएको थियो। मुम्बईका लागि तिलक वर्माले सर्वाधिक ५७ रन बनाए भने नमन धिरले ४७ रनको योगदान दिए। साथै, रोहित शर्माले २२ रन, राज बावाले १६ रन तथा विल ज्याक्सले १० रन जोडे।
बैंगलुरुका अनुभवी बलर भुवनेश्वर कुमारले उत्कृष्ट प्रदर्शन गर्दै ४ विकेट लिएर मुम्बईको ब्याटिङलाई दबाबमा राखेका थिए।
यस जितसँगै ११ खेलबाट १४ अंक जोडेको बैंगलुरु अंक तालिकाको शीर्ष स्थानमा पुगेको छ। समान १४–१४ अंक भएका सनराइजर्स हैदराबाद र गुजरात टाइटन्स नेट रनरेटका आधारमा क्रमशः दोस्रो र तेस्रो स्थानमा रहेका छन्। उता, ६ अंकमा सीमित मुम्बई इन्डियन्स भने प्लेअफको दौडबाट बाहिरिएको छ।
