काठमाडौं, वैशाख २७ । सामुदायिक रेडियो प्रसारक संघ (अकोराब), रेडियो ब्रोडकास्टर्स फोरम (आरबीएफ) र ब्रडकास्टिङ एसोसिएसन अफ नेपाल (बान) ले संयुक्त रूपमा विज्ञप्ति जारी गर्दै सङ्गीत रोयल्टी संकलनको नाममा एफएम रेडियो सञ्चालकमाथि भइरहेको धरपकडप्रति गम्भीर आपत्ति जनाएका छन् ।
संस्थाहरूले भक्तपुर एफएमका सञ्चालकमाथि वैशाख २५ गते सङ्गीत रोयल्टी संकलन समाजको नाममा फौजदारी अभियोग लगाई गरिएको पक्राउप्रति भर्त्सना गर्दै यस्तो गतिविधि तत्काल रोक्न माग गरेका हुन् । साथै, भक्तपुर जिल्ला अदालतले प्रतिवादीलाई साधारण तारिखमा रिहा गरेकोप्रति अदालतप्रति आभार व्यक्त गरिएको छ ।
संयुक्त विज्ञप्तिमा सर्जकको सम्मान र बौद्धिक सम्पत्तिको संरक्षणमा एफएम रेडियोहरूको ऐतिहासिक भूमिका रहेको उल्लेख गर्दै सर्जकको पारिश्रमिकप्रति आफूहरू पूर्ण प्रतिबद्ध रहेको जनाइएको छ । तर, विद्यमान कानुनको गलत व्याख्या गर्दै व्यावसायिक एजेन्ट परिचालन गरी रेडियोकर्मी र सञ्चालकलाई अपराधीसरह व्यवहार गर्ने कार्य अस्वीकार्य भएको संस्थाहरूको भनाइ छ ।
विज्ञप्तिमा प्रतिलिपि अधिकार ऐन, २०५९ तथा नियमावली, २०६१ को पूर्ण पालना गर्न तयार रहे पनि दफा २७ को दुरुपयोग गरी देवानी विषयलाई फौजदारी मुद्दामा परिणत गरिएको आरोप लगाइएको छ ।
त्यस्तै, एक संस्थालाई रोयल्टी बुझाइसकेपछि पनि विभिन्न सर्जकले छुट्टाछुट्टै दाबी गर्न सक्ने कानुनी अस्पष्टता रहेको भन्दै सङ्गीत रोयल्टी संकलन तथा वितरण प्रणालीलाई पारदर्शी, एकद्वार र न्यायोचित बनाउन सरकारसँग माग गरिएको छ ।
एफएम रेडियोहरूको आर्थिक अवस्था कमजोर हुँदै गएको उल्लेख गर्दै संस्थाहरूले रोयल्टी निर्धारणका आधार र दर पुनरावलोकन गर्नुपर्ने बताएका छन् । साथै, सङ्गीत रोयल्टी संकलन तथा वितरणका लागि भरपर्दो सरकारी निकाय स्थापना गर्नुपर्ने मागसमेत अघि सारिएको छ ।
विज्ञप्तिमा सर्वोच्च अदालतमा विचाराधीन विषयमा भइरहेको धरपकड र मुद्दा प्रक्रियाले कानुनी प्रक्रियामै असर पुर्याउने भन्दै यस्ता गतिविधि तत्काल रोक्न सम्बन्धित पक्षलाई आग्रह गरिएको छ ।
Published Date: 10 May 2026
