भक्तपुर, फागुन १८ । भक्तपुर मोडर्न इङ्गलिस सेकेण्डरी स्कुल तथा हिसान भक्तपुरको आयोजनामा चौथौं हिसान अन्तरविद्यालय फुटसल प्रतियोगिता सफलतापूर्वक सम्पन्न भएको छ। कक्षा ११ र १२ मा अध्ययनरत विद्यार्थीहरूबीच फागुन १६ र १७ गते सञ्चालन गरिएको प्रतियोगितामा विभिन्न विद्यालयका छात्र–छात्राबीच प्रतिस्पर्धा भएको थियो।
प्रतियोगितामा पुरुषतर्फको उपाधि काठमाडौँ वर्ल्ड स्कुलले जितेको छ। फाइनल खेलमा उत्कृष्ट प्रदर्शन गर्दै काठमाडौँ वर्ल्ड स्कुल प्रथम बनेको हो। उपविजेताको उपाधि सुप्रिम एकेडेमीले हात पारेको छ। पुरुषतर्फ ‘फेयर प्ले अवार्ड’ सिबर्ड इन्टरनेश्नल कलेजलाई प्रदान गरिएको आयोजकले जनाएको छ।
त्यसैगरी महिलातर्फ पनि काठमाडौँ वर्ल्ड स्कुल नै प्रथम भएको छ भने उपविजेता अक्सफोर्ड प्राक्टिकल स्कूल बनेको छ। महिलातर्फको ‘फेयर प्ले अवार्ड’ जनप्रेमी वर्ल्ड स्कुलले प्राप्त गरेको छ। खेलमा काठमाडौँ वर्ल्ड स्कूलकै बेस्ट गोल किपरमा प्रिन्स लामा र सकिला बास्तोला, टप स्कोररमा जेनस तकाछें र रोज मेरी श्रेष्ठ घोषित भए।
समापन कार्यक्रममा हिसान केन्द्रीय अध्यक्ष युवराज शर्मा प्रमुख अतिथिका रूपमा उपस्थित थिए। त्यसैगरी हिसानका केन्द्रीय उपाध्यक्ष विरेन्द्र जयना विशेष अतिथि तथा हिसान भक्तपुरका सचिव दिनेश पाण्डे अतिथिका रूपमा सहभागी भएका थिए। उनीहरूले विजेता तथा उपविजेता टोलीलाई ट्रफी, मेडल र प्रमाणपत्र प्रदान गरेका थिए।
प्रतियोगितामा चिकित्सा सेवा मध्यपुर अस्पाताले उपलब्ध गराएको थियो।
विद्यार्थीहरूमा खेलकुदप्रति रुचि अभिवृद्धि गर्नुका साथै अन्तरविद्यालय सहकार्य र स्वस्थ प्रतिस्पर्धाको भावना विकास गर्ने उद्देश्यले आयोजना गरिएको उक्त प्रतियोगिता उत्साहजनक सहभागितासहित सम्पन्न भएको हिसां भक्तपुरका अध्यक्ष अनिल कसपालले जनाएका छन्।
