भक्तपुरमा चौथो हिसान अन्तरविद्यालय फुटसल प्रतियोगिता फागुन १६ र १७ गते हुँदै

भक्तपुर, फागुन १४ । भक्तपुर मोडर्न इङ्गलिस सेकेण्डरी स्कुल तथा भक्तपुर हिसान खेलकुद समितिको आयोजनामा कक्षा ११ र १२ मा अध्ययनरत विद्यार्थीहरूबीच चौथो हिसान अन्तरविद्यालय फुटसल प्रतियोगिता यही फागुन १६ र १७ गते सञ्चालन हुने भएको छ।

प्रतियोगितामा पुरुषतर्फ नौ वटा टोली सहभागी हुनेछन्। सहभागी टोलीहरूमा आयोजक मोडर्न इङ्गलिस सेकेण्डरी स्कुल, जनप्रेमी वर्ल्ड स्कुल–२, काठमाडौँ वर्ल्ड स्कुल–२, सिबर्ड इन्टरनेशनल कलेज, विनायक निकेतन स्कुल, सुप्रिम एकेडेमी तथा अक्सफोर्ड प्राक्टिकल स्कुल लगायत रहेका छन्।

त्यसैगरी महिलातर्फ मोडर्न इङ्गलिस सेकेण्डरी स्कुल, जनप्रेमी वर्ल्ड स्कुल, काठमाडौँ वर्ल्ड स्कुल–२, सुप्रिम एकेडेमी र अक्सफोर्ड प्राक्टिकल स्कुल गरी कुल छ टोलीबीच प्रतिस्पर्धा हुने आयोजकले जनाएको छ।

प्रतियोगिताअन्तर्गत फागुन १६ गते सम्पूर्ण लिग चरणका खेलहरू सम्पन्न गरिनेछ भने सेमिफाइनल र फाइनल खेलहरू फागुन १७ गते आयोजना गरिने कार्यक्रम रहेको छ।

विद्यार्थीहरूमा खेलकुदप्रति रुचि अभिवृद्धि गर्नुका साथै अन्तरविद्यालय सहकार्य र स्वस्थ प्रतिस्पर्धाको भावना विकास गर्ने उद्देश्यले प्रतियोगिता आयोजना गरिएको आयोजक पक्षले जनाएको छ।