काठमाडौं, फागुन १३ । नर्वेजियन क्लब बोडो/ग्लिम्टले युइएफए च्याम्पियन्स लिगमा सनसनी मच्चाउँदै साविक उपविजेता इन्टर मिलानलाई हराएर पहिलो पटक अन्तिम १६ मा पुगेको छ।
दोस्रो लेगमा मंगलवार बोडो २-१ ले विजयी भयो । पहिलो लेगमा ३-१ ले जितेको बोडो समग्रमा ५-२ ले अगाडि रह्यो। इन्टरको घरेलु मैदान सान सिरोमा भएको खेलमा बोडो/ग्लिम्टका जेन्स पेट्टर हाउगे नायक बने। उनले एक गोल गरे भने अर्को गोलका लागि पास दिए।
इन्टर च्याम्पियन्स लिगको तीन पटकको विजेता हो। इन्टर सिरिए एमा १० अंकको अग्रतासहित शीर्ष स्थानमा छ। त्यसैले पनि इन्टरलाई नै जितको बलियो दाबेदार मानिएको थियो।
तर बोडो/ग्लिम्टले दोस्रो लेगमा पनि सानदार प्रदर्शनलाई निरन्तरता दियो । यसअघि बोडोले म्यानचेस्टर सिटी र एट्लेटिको मड्रिडलाई हराइसकेको थियो।
खेलको ५८औं मिनेटमा हाउगेले गोल गर्दै बोडोलाई अग्रता दिलाए। त्यसपछि ७२औं मिनेटमा हाकोन इभ्जेनले अर्को गोल गरे।
इन्टरका लागि अलेसान्द्रो बास्टोनीले ७७ औं मिनेटमा गोल फर्काए पनि त्यो पर्याप्त भएन। बोडो/ग्लिम्टले अन्तिम १६ मा म्यानचेस्टर सिटी वा स्पोर्टिङ सीपीसँग खेल्नेछ।
एट्लेटिको म्याड्रिड ,लेभरकुसन र न्युक्यासल पनि च्याम्पियन्स लिगको अन्तिम १६ मा पुगेका छन्। – एजेन्सी
Published Date: 25 February 2026
