काठमाडौँ, पुस २२ । साताको तेस्रो कारोबार दिन मंगलबार सेयरबजार परिसूचक नेप्सेमा सुधार आएको छ । मंगलबार नेप्से ९.९३ अंकले बढेर २ हजार ६४९.३० विन्दुमा कायम भएको हो । मंगलबार कारोबार रकम पनि सात अर्ब रुपैयाँ नाघेको छ ।
कुल १ करोड ४८ लाख ३१ हजार २४१ कित्ता सेयर ७ अर्ब १२ करोड ३३ लाख ६५ हजार रुपैयाँमा किनबेच भएको छ । कारोबार रकम कात्तिक तेस्रो साता यताकै उच्च हो ।
मंगलबार सेयरबजारमा ३३४ कम्पनीका सेयर कारोबार भएका छन् । यी मध्ये १४८ कम्पनीका सेयरमूल्य बढेका छन् भने १०३ कम्पनीका सेयरमूल्यमा गिरावट आएको छ ।
सेयरबजारमा सूचीकृत समूहगत परिसूचकमध्ये होटेल तथा पर्यटन र उत्पादनशील समूहको परिसूचक ओरालो लागेका छन् । अरु बाँकी सबै समूहको परिसूचक सकारात्मक रहेका छन् ।
सबैभन्दा धेरै वित्त समूहको परिसूचक २.८७ प्रतिशतले बढेको छ । जीवन विकास लघुवित्त वित्तीय संस्था, थ्रीस्टार हाइड्रोपावर लिमिटेड तथा हिमालयन बैंकको म्युचुअल फण्डका लगानीकर्ताले सबैभन्दा बढी कमाएका छन् । सबैभन्दा बढी गुमाउनेमा भने रुरु जलविद्युत परियोजना, ट्रेड टावर लिमिटेड तथा सान्भी इनर्जीका सेयरधनी रहेका छन् ।
Published Date: 06 January 2026
