भक्तपुर, पुस १२ । आइकन मिडिया हाउस प्रा. लि. तथा आइकन खबर डटकमको तेस्रो वार्षिकोत्सवको अवसरमा आर्गस एजुकेशनको संयुक्त आयोजनामा सम्पन्न खुला रक्तदान कार्यक्रम सफलतापूर्वक सम्पन्न भएको छ।
शनिबार बिहान भक्तपुर नगरपालिका–१, नःपुखु क्षेत्रस्थित मिनीबस पार्क अगाडि सो कार्यक्रम आयोजना गरिएको हो। कार्यक्रममा ३५ जना स्वस्थ व्यक्तिहरूले स्वेच्छिक रूपमा रक्तदान गर्दै मानव जीवन रक्षा अभियानमा योगदान दिएका छन्। बिहान ८ बजेदेखि सुरू भएको रक्तदान कार्यक्रम बिहान ११:३० बजेसम्म संचालन भएको थियो।
आइकन मिडिया हाउस प्रा. लि. डिजिटल मिडिया, सामग्री उत्पादन, विज्ञापन तथा जनसम्पर्कका क्षेत्रमा सक्रिय बहुआयामिक सञ्चार संस्था हो। यसअन्तर्गत सञ्चालन हुँदै आएको आइकन खबर डटकम विश्वसनीय नेपाली अनलाइन समाचार पोर्टलका रूपमा स्थापित हुँदै आएको छ।
त्यसैगरी, आर्गस एजुकेशन शिक्षा तथा परामर्श क्षेत्रमा क्रियाशील संस्था हो, जसले अध्ययन विदेश, IELTS, PTE लगायतका भाषा परीक्षा तयारी, भिसा परामर्श तथा करियर मार्गदर्शन सेवा प्रदान गर्दै आएको छ।
रक्तदान कार्यक्रमको प्राविधिक सहयोग नेपाल रेडक्रस सोसाइटी, भक्तपुर शाखाले गरेको थियो भने फोटोग्राफी पार्टनरका रूपमा ट्रेङ्गल फोटो स्टुडियो रहेको थियो। कार्यक्रममा गायक कपिल कसपालले भक्तपुर बोलको गीत प्रस्तुत गर्दै मनोरन्जन प्रदान गरेका थिए।
आयोजक संस्थाहरूले रक्तदानलाई सामाजिक उत्तरदायित्व र मानवताको महत्वपूर्ण कार्यका रूपमा लिँदै यस्ता कार्यक्रमलाई निरन्तरता दिने प्रतिबद्धता व्यक्त गरेका छन्। सहभागी रक्तदाताप्रति आयोजकले आभार व्यक्त गरेका छन्।