भक्तपुर, भदौ १६ । भक्तपुर सिर्जनानगरस्थित भक्तपुर मोडर्न इङ्लिस स्कुलमा कक्षा ११ र १२ का विद्यार्थीहरूले यस वर्ष पनि विद्यालयस्तरीय निर्वाचन सम्पन्न गरेका छन् । निर्वाचनमार्फत अध्यक्ष, सचिव र कोषाध्यक्ष पदका लागि मतदान भई विजयी उम्मेदवार घोषणा गरिएको छ ।
सोमबार बिहान ८ बजेदेखि सुरु भएको मतदानमा सम्पूर्ण प्रक्रिया कक्षा १२ का विद्यार्थीहरूले नै निर्वाह गरेका थिए । मतदान अधिकृत, सुरक्षाकर्मीदेखि म्यादी प्रहरीको भूमिका विद्यार्थीहरूले सक्रियतापूर्वक पूरा गरेका थिए । कक्षा ११ का विद्यार्थीहरूले पहिलो पटक मतदानको अनुभव लिँदै आफूलाई नयाँ अवसर मिलेको बताएका छन् ।
निर्वाचन प्रक्रियामा अधिश्री कसपाल र उनको समूहको उल्लेखनीय भूमिका रहेको थियो भने विद्यालय प्रशासन, शिक्षक, कर्मचारी र प्राचार्यले समेत सक्रिय सहयोग गरेका थिए । मतदान स्थलको अनुगमन मोडर्न स्कुल तथा कलेजका प्राचार्य अनिल कसपाल र कोअर्डिनेटर शशी कसपालले गरेका थिए।
मतदान सम्पन्न भएपछि मतगणना गरी विजयी उम्मेदवारलाई बधाईसमेत दिइएको विद्यालयले जनाएको छ । निर्वाचनलाई सफल बनाउन एक हप्ताअघि देखिनै शिक्षक, कर्मचारी र विद्यार्थीको सक्रिय सहभागिता रह्यो । उम्मेदवारको मनोनयन, अन्तिम नामावली प्रकाशन र चुनाव चिन्ह वितरणपछि विद्यार्थीहरूले घोषणापत्रसहित प्रचारप्रसार गरेका थिए । मतदान मार्फत कक्षा १२ का आर्जन कसपाल अध्यक्ष, प्रतीक्षा कोछाला उपाध्यक्ष, दिपेश फुँयाल सचिव र कक्षा ११ का सन्तोष विक्रम शाह कोषाध्यक्ष पदमा निर्वाचित भएका हुन्।
यसै अवसरमा कक्षा १२ को होटल म्यानेजमेन्ट संकायका विद्यार्थीहरूले विभिन्न परिकारको प्रदर्शनी गरेका थिए । आफ्ना सिप र सीपलाई प्रस्तुत गर्दै तयार पारिएका ती परिकार शिक्षक, कर्मचारी र विद्यार्थीहरूले रमाइलोका साथ अवलोकन गर्नुका साथै स्वाद लिँदै प्रशंसा गरेका थिए ।
