काठमाडौं, साउन २ । गत आर्थिक वर्ष २०८१-८२ मा २१ खर्ब २४ अर्ब ९१ करोड रुपैयाँको सेयर कारोबार भएको छ। अघिल्लो आवको तुलनामा यो १८९.२३ प्रतिशतले बढी हो।
अघिल्लो आवमा ७ खर्ब ३४ अर्ब ६८ करोड रुपैयाँको कारोबारमा भएकोमा गत वर्ष करिब तीन गुणा बढेको हो। यसअघि आर्थिक वर्ष २०७७-७८ मा सबैभन्दा धेरै १४ खर्ब ५४ अर्ब ४४ करोड रुपैयाँ बराबरको कारोबार भएको थियो ।
त्यस्तै २०८१ को असार मसान्तमा ३५ खर्ब ५३ अर्ब ६७ करोड रहेको बजार पुँजीकरण २०८२ असार मसान्तमा ३१.०५ प्रतिशतले वृद्धि भई ४६ खर्ब ५६ अर्ब ९८ करोड पुगेको छ ।
आर्थिक वर्ष २०८१-८२ को अन्तसम्ममा सूचीकृत कम्पनीको संख्या २७२ पुगेको छ । गत आर्थिक वर्षमा मर्जर तथा एक्विजिसनका कारण ३ कम्पनी सूचीकरणबाट हटेका छन् भने प्रथम सार्वजनिक निष्कासन (आइपीओ) मार्फत ४ वटा कम्पनी थपिएका छन् ।
प्रथम निष्कासन मार्फत ३ करोड ६५ लाख कित्ता सेयर, थप निष्कासन मार्फत ११ लाख २० हजार कित्ता सेयर, सरकारबाट थप गरिएको तथा स्थानीयलाई वितरण गरिएको ४ करोड ३२ लाख ५८ कित्ता सेयर, सामूहिक लगानी कोषका ३७ करोड ८१ लाख एकाई र संस्थागत ऋणपत्र ८३ लाख कित्ता गरी जम्मा ८० करोड ४२ लाख ८५ हजार कित्ता धितोपत्र सूचीकृत भएका छन् ।
Published Date: 18 July 2025
