भक्तपुर, जेठ १२ । भक्तपुर जिल्ला बचत तथा ऋण सहकारी संघ लि.को अन्तरलगानी तथा वित्तिय सेवा प्रवद्र्धन उपसमितिको आयोजनामा नेपाल बचत तथा ऋण केन्द्रीय सहकारी संघको प्राविधिक साझेदारीमा सहकारीमा पूँजी कोष पर्याप्तता CAR र पल्र्स अनुगमन प्रणाली तालिम रोयल थाई हस्पिटालीटी, राधेराधेमा सम्पन्न भयो ।
संघका अध्यक्ष कृष्ण गोविन्द लाखाजुले बचत तथा ऋणको एकल उद्देश्य बमोजिम बचत तथा ऋण सहकारी संघहरुले सदस्य संस्थाको बचत स्विकार्ने र ऋण लगानी कार्य सहकारी ऐनमा व्यवस्था भए बमोजिम नै गरी रहेको दाबि गरे । बैंक तथा वित्तीय संस्थालाई पोषणका निम्ती नै बचत तथा ऋण मुख्य कारोबार गर्ने सहकारी संघ तथा संस्थाहरुको बृद्धि विकासमा संकुचन हुने गरी मापदण्डहरु जारी भएको उनको भनाई थियो ।
उनले समग्र सहकारी अभियानलाई कमजोर र धरासायी बनाउने गरी जारी मापदण्डको तत्काल परिमार्जनका लागि माग गरे । उनले जारी मापदण्डमा तरलता सम्बन्धी व्यवस्था लगायतका विषय तत्काल सच्याउनु पर्ने अन्यथा कानुनी उपचारमा सहकारी अभियान लाग्नु पर्ने बताए ।
सहकारीका सदस्यको बचत सुरक्षा तथा जोखिम न्युनिकारणका मापदण्डहरु पालना गरी संस्था सुरक्षित राख्न कर्मचारीहरुले सदैब नयाँ ज्ञान सिप सिक्नका लागि जागरुक हुनुपर्ने उनको भनाइ थियो । उनले संस्थाको अवस्था बुझ्न CAR र पल्र्स आवश्यक रहेको बताए ।
संघका कोषाध्यक्ष एवं अन्तरलगानी तथा वित्तिय सेवा प्रवद्र्धन उपसमितिका संयोजक कान्छा भक्त घजुले संस्थाले CAR र पल्र्सको अनुपात हेरेर मात्र सदस्यको बचत लिने र जोखिम कति लिन सकिन्छ भन्ने कुरा थाहा पाउने बताए । उनले सिकेका ज्ञान सिप कार्यरत संस्थामा प्रयोग गरी दक्षता हासिल गर्नुपर्ने विचार राखे ।
संघका प्रमुख कार्यकारी अधिकृत बालकृष्ण धोजुले वित्तीय कारोबार गरेकै आधारमा बचत तथा ऋण सहकारीलाई बैंक भयो भन्नु गलत भएको बताए । उनले बचत तथा ऋण कारोबारको सिमाको आधारमा बर्गीकरण गरी नेपाल राष्ट्र बैंकबाट बैकिङ इजाजत लिने व्यवस्था गर्नुपर्ने बताए ।
उनले सहकारीमा देखिएको समस्या समाधान सहकारीलाई नियोजन गर्ने निर्देशन तथा मापदण्ड मात्र जारी गर्दैमा नहुने भन्दै व्यवहारिक तथा प्रगतिशिल कानुनको आवश्यकता रहेको बताए ।
संघको उपसमितिका सदस्य राजकुमार लघुुले सहकारीमा पूँजी कोष पर्याप्तता CAR र पल्र्स अनुगमन प्रणाली तालिम प्राविधिक विषय भएकोले यसको निरन्तर प्रयोग र सिकाई गर्नुपर्ने विचार राख्दै स्वागत मन्तव्य दिए ।
नेफस्कूनका प्रार्चाय बल्लभ तिमल्सिनाले सहकारीमा पूँजी कोष पर्याप्तता CAR को बारेमा र नेफस्कूनकै प्रशिक्षक उमेश कोईरालाले पल्र्स अनुगमन प्रणालीको विषयमा ज्ञान दिए । तालिममा सहभागीहरुले सहकारीले सहकारीमा पूँजी कोष पर्याप्तता CAR र पल्र्स अनुगमन प्रणालीको विषयमा प्रयोगात्मक सिकाई भएकोले खुशी व्यक्त गरे । तालिममा संघमा आबद्ध संस्थाहरुका पदाधिकारी, व्यवस्थापक तथा लेखासम्बन्धीत कर्मचारीहरु ३८ जनाको सहभागिता रहेको थियो । तालिमको समापन कार्यक्रमको संचालन संघका कर्मचारी रोकेश जोशीले गरेका थिए ।
