काठमाडौं, जेठ ८ । नेपालभरि निर्माण गरिएका पदमार्गको मापदण्ड अब एउटै हुने भएको छ ।
संस्कृति, पर्यटन तथा नागरिक उड्डयन क्षेत्रको विषयगत समितिको तेस्रो बैठकले देशभरिका पदमार्ग एउटै राष्ट्रिय मापदण्ड अनुसार निर्माण गर्ने निर्णय गरेको हो ।
पर्यटनमन्त्री बद्रीप्रसाद पाण्डेको अध्यक्षतामा बुधबार काठमाडौंमा बसेको विषयगत समितिको तेस्रो बैठकले सबै तहका सरकारले राष्ट्रिय पदमार्ग निर्माण मापदण्ड लागु गर्ने निर्णय गरेको हो ।
बैठकले पर्यटन विकासका लागि विभिन्न निर्णय गरेको छ । जसमा ग्रामीण पर्यटन प्रवद्र्धनका लागि प्रभावकारी ठानिएको होमस्टे सञ्चालन मापदण्ड समेत सबै तहमा कार्यान्वयन गर्ने निर्णय गरेको हो ।
यसका साथै प्रदेश र स्थानीय सरकारले आगामी आर्थिक वर्षको नीति तथा कार्यक्रम र बजेट बनाउँदा केन्द्र सरकारसँग तादाम्यता मिलाउने, संस्कृति तथा पर्यटन क्षेत्रमा स्थानीय तहको क्षमता अभिवृद्धि गर्न प्रदेश सरकारले सहयोग गर्ने निर्णय समेत गरेको छ । योसँगै पहिचान गरिएका पर्यटकीय गन्तव्य सौन्दर्यीकरण, प्रचारप्रसार तथा मर्मत सम्भारमा तीनै तहका सरकारले प्राथमिकता दिने, पर्यटनमा निजी क्षेत्रको लगानी आकर्षणका लागि वातावरण निर्माण गर्ने र अघिल्ला बैठकका निर्णय कार्यान्वयन गर्ने निर्णय गरेको छ ।
बैठकमा संघीय संस्कृति, पर्यटन तथा नागरिक उड्डयनमन्त्री पाण्डेसँगै प्रदेशका पर्यटन मन्त्रीहरू र समितिका सदस्यहरूको उपस्थिति थियो । बैठकमा मन्त्री पाण्डेले पर्यटन क्षेत्रमा तीन तहबीच समन्वय र साझेदारी आवश्यक रहेको बताए ।
