काठमाडौँ, फागुन ११ । स्पेनिस ला लिगामा सहज जितका साथ बार्सिलोना पुनः शीर्ष स्थानमा उक्लिएको छ ।
आइतबार बिहान भएको खेलमा लस पाल्मसलाई २-० ले पराजित गर्दै बार्सिलोना शीर्ष स्थानमा उक्लिएको हो । पाल्मसको घरेलु मैदानमा भएको खेलमा बार्सिलोनाको जितमा डानी ओल्मो र फेरान टोरेसले गोल गरे ।
खेलको ६२औं मिनेटमा ओल्मोले बार्सिलोनाका लागि पहिलो गोल गरे । दोस्रो हाफको इन्ज्युरी समयको अन्तिम तिर गोल गर्दै टोरेसले बार्सिलोनालाई सहज जित दिलाए ।
जितसँगै बार्सिलोना २५ खेलमा ५४ अंकका साथ तालिकाको शीर्ष स्थानमा उक्लिएको छ । पराजित पाल्मस समान खेलमा २३ अंकका साथ १७औं स्थानमा छ । २५ खेलबाट ५३ अंक जोडेको एट्लिटिको मड्रिड दोस्रो स्थानमा छ ।
रियल मड्रिड भने २४ खेलमा ५१ अंकका साथ तेस्रो स्थानमा छ । रियलको २५औं खेल आइतवार जिरोनासँग रहेको छ ।–एजेन्सी
