काठमाडौं, मंसिर १२ । चलचित्र विकास बोर्डको आयोजना तथा राष्ट्रपति रामचन्द्र पौडेलको प्रमुख आतिथ्यमा राष्ट्रपतिको कार्यालय शीतल निवासमा बुधवार आयोजित ‘राष्ट्रिय चलचित्र अवार्ड २०८०’ समारोहमा अभिनेता विपिन कार्की र अभिनेत्री स्वस्तिमा खड्का सर्वश्रेष्ठ अभिनेता-अभिनेत्री घोषित भएका छन् । कार्कीले फिल्म ‘प्रसाद २’ र खड्काले ‘दिमाग खराब’ बाट पुरस्कार प्राप्त गरेका हुन् ।
उत्कृष्ट निर्देशक फिल्म ‘दिमाग खराब’ को लागि निश्चल बस्नेत बने । सबैभन्दा धेरै अवार्ड ‘बुलाकी’ ले प्राप्त गर्यो । यो फिल्मले उत्कृष्ट फिल्मसहित लेखनमा राजबहादुर साने र छायाङ्कनमा शिव ढकाल पुरस्कृत भए ।
चलचित्र विकास बोर्डका अध्यक्ष दिनेश डिसी सभापति र सञ्चार तथा सूचना प्रविधि मन्त्री पृथ्वी सुब्बा गुरुङ विशेष अतिथिको रूपमा समारोहमा नेपाली फिल्म क्षेत्रका दिग्गज कलाकार, निर्माता, निर्देशक तथा पत्रकारहरूको सहभागिता थियो ।
