काठमाडौं, कार्तिक ३० । सोल्टी होटल लिमिटेडले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण प्रकाशित गरेको छ ।
विवरण अनुसार होटलको आम्दानीसँगै नाफा पनि बढेको छ । कम्पनीले चालु आवको असोजमसान्तसम्म १२ करोड ११ लाख रुपैयाँ खुद नाफा गरेको छ । नाफा गत आवको यसै अवधिको तुलनामा १८.३४ प्रतिशतले बढेको हो। गत आर्थिक वर्षको सोही अवधिमा होटलले १० करोड २३ लाख रुपैयाँ नाफा कमाएको थियो ।
पर्यटकीय तथा व्यावसायिक गतिविधिमा सुधार आउँदा होटलको आम्दानीसँगै नाफा पनि बढेको हो । अघिल्लो आर्थिक वर्षको असोज मसान्तसम्ममा ३९ करोड ९६ लाख आम्दानी गरेकोमा चालु आवको असोजमसान्तसम्म ५१ करोड ४३ लाख आम्दानी गरेको छ । होटलको खर्च समेत २९ प्रतिशतले बढेको छ ।
९२ करोड ८९ लाख रुपैयाँ चुक्ता पुँजी रहेको यस होटलको जगेडा कोषमा १ अर्ब ५५ करोड रुपैयाँ रहेको छ। समीक्षा अवधिमा होटलको प्रतिसेयर आम्दानी १ रुपैयाँ ३० पैसा तथा प्रतिसेयर नेटवर्थ २६ रुपैयाँ ६२ पैसा रहेको छ । यसको प्रतिसेयर अंकित मूल्य १० रुपैयाँ रहेको छ ।
Published Date: 15 November 2024
