काठमाडौँ, कात्तिक २८ । निर्णायक खेलमा यूएईलाई ८ विकेटले हराउँदै नेपाली महिला क्रिकेट टिम यू–१९ टी– २० महिला विश्वकपका लागि छनोट भएको छ । ८४ रनको लक्ष्य १६ ओभर अगावै पूरा गर्दै नेपाल यू–१९ महिला टिम विश्वकपमा छनोट भएको हो । नेपाल पहिलो पटक महिला विश्वकपमा छानिएको हो । नेपालले ८४ रनको लक्ष्य २ विकेट गुमाएर १४ दशमलव ४ ओभरमा पूरा गर्दै उत्कृष्ट जित हात पारेको हो ।
रनरेटमा यूएईलाई पछाडि पार्नैपर्ने खेलमा नेपालले शानदार प्रदर्शन गर्दै जित हात पारेको हो । नेपाललाई विश्वकपमा छनोट हुन १६ ओभरमै जित आवश्यक थियो । टस जितेर ब्याटिङ गरेको यूएईले निर्धारित २० ओभरमा ९ विकेट गुमाएर ८३ रन बनाएको थियो । यूएईका लागि कप्तान समाइरा धर्निधरकाले सर्वाधिक ३१ रन बनाइन् ।
त्यस्तै रिनिथा रञ्जितले २० रन बनाइन् भने ओपनर लावन्या केनी र इन्दुजा नन्दाकुमारले समान १० रन बनाइन्। नेपालका लागि कृष्मा गुरुङले ४ ओभरमा १७ रन दिएर ४ विकेट लिइन् । उनले कप्तान धर्निधरकासहित ३ खेलाडीलाई एकै ओभरमा आउट गराएकी थिइन् । नेपालका लागि रिया शर्मा र सीमा केसीले समान २-२ विकेट लिँदा रचना कुमारी चौधरीले १ विकेट लिएकी थिइन् ।
