काठमाडौं, कार्तिक ५ । त्रिभुवन विश्वविद्यालय स्नातक तहको परीक्षामा नेपाली भाषामा पनि प्रश्नपत्र तयार पारिने भएको छ ।त्रिविकी सहकूलपति तथा शिक्षामन्त्री विद्या भट्टराईले आगामी वर्षदेखि त्रिविका वार्षिक परीक्षा प्रणालीअनुसारका सबै संकायमा स्नातक तहका प्रश्नपत्र नेपालीमा पनि हुने जानकारी दिएकी हुन् ।
त्रिविका प्रश्नहरू अंग्रेजी भाषामा मात्रै सोधिँदै आएकामा आगामी वर्षदेखि नेपालीमा पनि सोधिने भएको हो । शिक्षा, विज्ञान तथा प्रविधिमन्त्री भट्टराईले त्रिविका प्रश्नपत्रहरू नेपाली भाषामा पनि तयार पारिने स्पष्ट पारेकी हुन् । ‘त्रिभुवन विश्वविद्यालयले आगामी वर्षदेखि वार्षिक परीक्षा प्रणालीअनुसार सबै संकाय्को स्नातक तहका प्रश्नपत्रह अंग्रेजी र नेपाली दुवै भाषामा सोधिने निर्णय गरेको छ ।
उक्त व्यवस्थाअनुसार आगामी प्रथम वर्षको परीक्षादेखि अनिवार्य रूपमा लागू गरी क्रमशः दोस्रो, तेस्रो र चौथो वर्षमा समेत लागू गर्ने निर्णय गरेको छ,’ मन्त्री भट्टराईले भनेकी छन्, ’हाललाई शिक्षाशास्त्र संकाय, मानविकी संकाय, व्यवस्थापन संकाय र कानुन संकायको स्नातक तहको परीक्षामा नेपाली र अंग्रेजी दुवै भाषामा प्रश्नपत्र तयार गरिनेछ ।’ त्रिविका परीक्षामा प्रश्नपत्र अंग्रेजी भाषामा मात्रै सोधिँदा समस्या उत्पन्न भएको भन्दै संसद्मा पनि प्रश्न उठेको थियो ।
Published Date: 21 October 2024
