काठमाडौं, भदौ १९ । काठमाडौं महानगरपालिकाका मेयर बालेन्द्र साह (बालेन) को एउटा पोस्ट फेसबुकले उडाइदिएपछि त्यसको नकारात्मक प्रभाव प्रधानमन्त्री केपी शर्मा ओलीको फेसबुक पेज तथा ट्वीटर हेण्डलमा परेको छ ।
सामाजिक सञ्जालमा बालेनको उक्त पोस्ट उठाएको दोष सत्तारुढ एमालेलाई लगाइँदै छ, यद्यपि यसको आधिकारिक पुष्टि भने भएको छैन । उक्त पोस्ट उडाउन रिपोर्ट गरेको अपुष्टि आरोपकै कारण सामाजिक सञ्जालमा प्रधानमन्त्रीलाई सामाजिक सञ्जालमा अनफलो गर्ने अभियान नै चलाइएको छ ।
मंगलवार रातिदेखि सामाजिक सञ्जालमा प्रधानमन्त्रीलाई अनफलो गर्ने क्रम प्रारम्भ भएको छ । एक्समा एक जना प्रयोगकर्ताले लेखेका छन्– ‘एमाले कार्यकर्ताहरुले रिपोर्ट गरेर बालेनको स्टाटस उडाएपछि अहिले केपी ओलीको फेसबुक पेज अनफलो र रिपोर्ट गर्ने अभियान सुरु भएको छ । हिजोसम्म ६६६के (छ लाख ६६ हजार) फलोअर्स भएको पेज अहिले ६३२के (छ लाख ३२ हजार) मा झरेको छ । तपाईंले गर्नु भयो ?’
यो सामग्री तयार पार्ने बेलासम्ममा प्रधानमन्त्रीको आधिकारिक फेसबुक पेजमा ५९५के (५ लाख ९५ हजार) मा झरेको छ ।
