सिन्धुली, भदौ ९ । सिन्धुलीको गोलञ्जोर गाउँपालिका–१ कुँडुलेबाट सुनकोशी नदीमा खसेको जिपलाई गोताखोरको टोलीले फेला पारेको छ । तर त्यो जिपमा सवार तीन जना भने अझै पनि बेपत्ता छन् ।
जिल्ला प्रहरी कार्यालय सिन्धुलीका एसपी गोविन्द काफ्लेका अनुसार आज बिहानपख २ बजेतिर गाडि फेला पारिएको हो । ‘गाडि त भेटियो तर मान्छे अझै भेटिएका छैनन्,’ एसपी काफ्लेले भने, ‘खोजी कार्य जारी छ ।’
खोटाङको हलेसीबाट काठमाडौंतर्फ आउँदै गरेको प्रदेश ३–०१–०२३ च ६३६६ नम्बरको इसुजु गाडि शनिबार साँझ करिब साढे ५ बजेतिर सिन्धुलीको गोलञ्जोर गाउँपालिका–१ कुँडुलेबाट सुनकोशी नदीमा खसेको थियो ।
प्रहरीका अनुसार सो गाडी सुनकोशी नदीमा खस्दा भक्तपुर सूर्यविनायक नगरपालिका जगाती बस्ने ३२ वर्षीय अबिन बाके, ३० वर्षीय प्रनित स्यागु र ३७ वर्षीय बलराम घटुवा बेपत्ता छन् ।
सँगै गाडीमा सवार २७ वर्षीय सुशान्त कक्षपतिले भने दुर्घटनामा बचेका छन् । अरु तीन जना बेपत्ता छन् । प्रहरी अधिकारीहरूले खोजी कार्य जारी राखेको छ । दुर्घटनामा बाँचेका सुशान्त सँगै गाडीमा आएका साथीहरू नदीमा बिलाउँदा खोलाबाट निस्किए । उनलाई आफू कसरी निस्किएँ र साथीहरू कहाँ पुगे थाहा छैन । सुनकोसी नदीबाट बाहिर निस्किएपछि केहीबेर उनी बोल्न सकेनन् । घटनास्थलमा उपस्थित सर्वसाधरणले उनलाई कति जना सवार थिए, कहाँबाट आएको ? कसरी यस्तो भयो ? लगायतका प्रश्न गरे । तर, उनी केहीबेर आफन्तलाई फोन लगाइ दिन मात्रै आग्रह गरिएको भिडियोमा देखिन्छ ।
दुर्घटनास्थलबाट स्थानीय गणेश खड्काले सामाजिक सञ्जालमा राखेको भिडिओमा घाइते सुशान्त फोनमा कोही मान्छेसँग बोलिरहेका थिए । उनले ‘अंकल’ सम्बोधन गर्दै फोनमा भनेका छन्, ‘म मात्रै निस्कें । कसरी निस्कें मलाई थाहा छैन ।’ साथीहरू गुमाएका उनी दुर्घटना सम्झँदै निकैबेर भावविह्वल बनेका थिए ।
