काठमाडौं, साउन २१ । प्रधानमन्त्री केपी शर्मा ओलीले नेपालको शान्ति प्रक्रियालाई सफलताका साथ निष्कर्षमा पुर्याउने बताएका छन् ।
आज (मंगलबार) महान्यायधीवक्ता कार्यालयमा आयोजित सरकारी वकिलहरूसँगको छलफलमा प्रधानमन्त्री ओलीले संक्रमणकालीन न्यायसम्बन्धी विषय (टीआरसी) मा विभिन्न देशले चासो व्यक्त गरिरहेको भन्दै सफलताका साथ निष्कर्षमा पुर्याउने बताएका हुन् । संक्रमणकालीन न्यायसम्बन्धी विधेयक सदनमा पेस भएको भन्दै प्रधानमन्त्री ओलीले यही अधिवेशनबाट पारित गर्ने बताए ।
उनले उक्त विधेयक पीडितमैत्री र पीडित केन्द्रित भएर बनाइएको भन्दै कोशेढुंगाको रूपमा पारित हुने बताए । प्रधानमन्त्री ओलीले सामाजिक सञ्जालमार्फत सामाजिक मूल्य मान्यता तोड्ने प्रयास भइरहेको टिप्पणी गरे । उनले वर्तमान सरकारले देशविरोधी काम नगर्ने र विकासको कामलाई सकारात्मक ढंगले अघि बढाउने उल्लेख गरे ।
उनले अहिलेको सरकारले आलोचना गर्ने ठाउँ नदिने गरी काम गर्ने समेत दावी गरे । प्रधानमन्त्री ओलीले यसअघि सरकारमा रहँदा गरेका कामहरू गौरवबोध गर्ने प्रकारकै रहेको दाबी गरे । उनले अहिले फोटो टास्नका लागि नभई सकारात्मक काम गर्नका लागि प्रधानमन्त्री पद सम्हालेको पनि बताएका छन् ।
