काठमाडौं, साउन ११ । कीर्तिपुर नगरपालिकाका प्रमुख राजकुमार नकर्मीको दुखद निधन भएको छ । यसैबीच, दिवंगत नगर प्रमुख नकर्मीको पार्थिव शरीरलाई अहिले बिहान ९ बजेदेखि नगरपालिका ल्याउन तयारी भैरहेको छ । ६० वर्षिय नगर प्रमुख नकर्मीलाई बिहीवार राति ८ बजे उपचारमा संलग्न डाक्टरद्वारा मृत घोषणा गरिएको वडा नम्बर ७ का अध्यक्ष दिवाकर अधिकारीले पुष्टि गरेका छन् ।
नगर प्रमुख नकर्मी विगत लामो समयदेखि मृगौलाको समस्याका कारण उपचार गराउँदै आएका थिए । कीर्तिपुर नगरपालिकाले बिहीवार एउटा प्रेस विज्ञप्ती जारी गर्दै स्वास्थ्यमा थप समस्या आएकाले वीर अस्पताल, काठमाडौंको सघन उपचार कक्ष (आइसीयू) मा उपचारका लागि भर्ना गरिएको जनाएको थियो । उपचारकै क्रममा नगर प्रमुख नकर्मीको निधन भएको हो ।
स्वास्थ्यमा जटिलता आएपछि उनलाई वीर अस्पतालको आइसीयूमा सारिएको थियो । मिर्गौलामा समस्या आएपछि उनी साउन २ गतेदेखि वीर अस्पतालमा भर्ना गरिएको थियो ।
कीर्तिपुर नगरपालिकाकी कार्यवाहक प्रमुख सुनिता शाक्यका अनुसार प्रमुख नकर्मीलाई पहिलादेखि नै मृर्गौला सम्बन्धी समस्या थियो, शुक्रवारदेखि गाह्रो भएर आइसीयूमा राखिएका थियो ।’ मेयर नकर्मीले आफ्नो स्वास्थ्यमा निरन्तर समस्या आएपछि साउन १ गतेदेखि नै शाक्यलाई कार्यवाहक प्रमुखको जिम्मेवारी दिएका थिए ।
