कास्की, फागुन ८ । पोखरा महानगरपालिका वडा नम्बर १८ को सराङकोट, ग्यारजातीमा रहको बाल सुधार गृहमा झडप हुँदा तीन बालक घाइते भएका छन् । सोमबार राति भएको झडपमा बागलुङ, म्याग्दी र स्याङ्जाका एक/एक गरी तीन जना घाइते भएको प्रहरीले जनाएको छ ।
सोमबार राति १० बजेतिर खाना खाने लाममा बस्ने क्रममा झडप भएको हो । झडपमा घाइतेमध्ये दुई जनालाई टाउकोमा र एक जना सामान्य घाइते भएकोमा उपचारपछि तीनै जना सुधार गृह फर्किसकेको जिल्ला प्रहरी कार्यालय कास्कीका प्रहरी निरीक्षक सूर्य रानाले जानकारी दिए।
“खाना खाने लाइनामा बस्ने बेला विवाद भयो भन्ने बुझिएको छ । उनीहरू मणिपाल शिक्षण अस्पतालमा उपचारपछि डिस्चार्ज भइसकेका छन्,” रानाले भने “घटनाको थप अनुसन्धान जारी छ । ”
अहिले देशभर आठ वटा बाल सुधार गृह छन् । बाल बिज्याइमा संलग्न साना बालबालिका र किशोरसमेत सँगै राख्दा समस्या भएको जानकारहरू बताउँछन् ।
Author
गोरखापत्र अनलाइन
Published Date: 20 February 2024
