काठमाडौं, असार २० । भौतिक पूर्वाधार तथा यातायात मन्त्रालयले यातायात व्यवस्था कार्यालयमा हुने भीडभाड हटाउनुका साथै बिचौलियाको संलग्नता छिट्टै अन्त्य गर्ने प्रतिबद्धता जनाएको छ ।
भौतिक पूर्वाधार तथा यातायात मन्त्रालयले सवारी चालक अनुमतिपत्र नवीकरण, श्रेणी थप्ने र यसअघि निवेदन दिएका तर सफल हुन नसकेकालाई पुनः आवेदन दिन विद्युतीय माध्यमबाट सेवा दिने निर्णय गरेको छ ।
‘यो मन्त्रालयको जिम्मेवारी पाएलगत्तै मैले यातायात व्यवस्था कार्यालयमा भीडभाड र बिचौलियाको संलग्नताको समस्या अन्त्य गर्ने निर्णय गरेको छु । नयाँ लाइसेन्सका लागि आवेदन दिने, पुरानाको नवीकरण, सवारीसाधनको क्लास थप्ने र अनलाइनमार्फत राजस्व भुक्तानी गर्ने व्यवस्था मिलाएको छ,’ गण्डकी प्रदेशको पोखराबाट अनलाइन सेवाको उद्घाटन गर्दै भौतिक पूर्वाधार तथा यातायातमन्त्री प्रकाश ज्वालाले भने ।
मन्त्रीका अनुसार सरकारले एक महिनाभित्र देशभरका यातायात कार्यालयबाट अनलाइन सेवा उपलब्ध गराउनेछ ।
‘अनलाइन सेवा सुरु भएपछि बायोमेट्रिक्स, लिखित परीक्षा र परीक्षणका लागि मात्रै यातायात व्यवस्था कार्यालयमा जानुपर्नेछ’, ज्वालाले भनिन् ।
यातायात व्यवस्था विभागका महानिर्देशक नारायणप्रसाद भट्टराईले प्रदेश मन्त्रालय र विभागले तोकेका चिकित्सकले स्वास्थ्य परीक्षणको व्यवस्था मिलाइने बताए ।
नेपालमा सरकारले झण्डै तीन लाख ६० हजार व्यक्तिलाई सवारी चालक अनुमतिपत्र जारी गरेको छ । लाइसेन्स नवीकरण र ड्राइभिङ श्रेणी थप्नका लागि अब यातायात व्यवस्था कार्यालयमा साँघुरो लाइनमा उभिनुपर्ने छैन । अबदेखि १० वर्षभित्र लाइसेन्स नवीकरण पनि हुने मन्त्रालयले जनाएको छ ।
