काठमाडौँ, जेठ २१ । रेलिगेसनको दवाव झेलिरहेको संकटा क्लबले सहिद स्मारक ‘ए’ डिभिजन लिगमा रेलिगेसन क्षेत्रमा संघर्ष गरिरहेको एफसी खुमलटारमाथि सहज जित हात पारेको छ ।
संकटाले खुमलटारमाथि ३–० को सहज जित हात पारेको हो । संकटाको सहज जितमा निशान खड्का, आयुष घलान र चन्दन दासले गोल गरे ।
सातदोबाटोस्थित एन्फा कम्प्लेक्समा आइतबार भएको खेलको १६औं मिनेटमा निशान खड्काको गोलबाट संकटाले खेलमा १–० को अग्रता लिन सफल भयो । ३८औं मिनेटमा आयुष घलानले गोल गर्दै संकटाको अग्रता दोब्बर पारे ।
त्यसपछि ७८औं मिनेटमा चन्दन दासले गोल गर्दै संकटालाई ३–० को जित दिलाए । यस महत्तपूर्ण जितसँगै संकटाले केही हदसम्म रेलिगेसनको दवाव छाडेको छ ।
१०औं स्थानमा उक्लिएको संकटाको २४ खेलबाट ३० अंक पुगेको छ । समान ३० अंक रहेपनि संकटा एपिएफ र एनआरटीभन्दा पछि रहँदा आर्मीभन्दा अघि छ ।
२८ अंक रहेको थ्री स्टार १२औं स्थानमा झरेको छ । पराजित खुमलटारलाई रेलिगेसनको दवाव बढेको छ । खुमलटार २४ खेलबाट २४ अंक जोडेर पुछारमा छ ।
Published Date: 04 June 2023
