दिउँसो देशका पहाडी भूभागमा आंशिक बदली रही केहि स्थानमा हल्कादेखि मध्यम वर्षा हुने

काठमाडौं, वैशाख ३१ । देशमा अहिले पश्चिमी वायुको साथै स्थानीय वायुको प्रभाव रहेको छ । बङ्गालको खाडीमा बनेको चक्रवात मोखाले नेपालमा खासै असर नपर्ने जल तथा मौसम विज्ञान विभागको मौसम पूर्वानुमान महाशाखाले जनाएको छ ।

महाशाखाका अनुसार चक्रवात शक्तिशाली बनेर उत्तर–उत्तर–पूर्व दिशातर्फ सर्दै बंगलादेश र म्यानमारको तटीय क्षेत्रतर्फ अघि बढेको छ । हाल देशको पहाडी भूभागमा आंशिक बदली रही बाँकी भूभागमा मौसम सामान्यतया सफा रहेको छ । गण्डकी र कर्णालीका एक–दुई स्थानमा हल्का वर्षा भइरहेको छ ।

दिउँसो देशका पहाडी भूभागमा आंशिक बदली रही पहाडी भूभागका थोरै स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ ।