काठमाडौं, वैशाख ३० । परराष्ट्रमन्त्री एनपी साउद र भारतीय विदेशमन्त्री डा एस जयशंकरबीच शुक्रबार ढाकामा भेटवार्ता भएको छ ।
उक्त भेट हिन्द महासागर सम्मेलन २०२३ को अवसरमा भएको ढाकास्थित नेपाली दूतावासले जनाएको छ । दूतावासले व्यापार, पारवहन, कनेक्टिभिटी र जनताबीचको सम्बन्धमा सहयोग सुदृढ गर्ने उपायबारे पनि छलफल भएको जनाएको छ ।
बंगलादेशको ढाकामा यही मे १२-१३ मा हुने छैटौं हिन्द महासागर सम्मेलनमा सहभागी हुन मन्त्री साउद शुक्रबार ढाका प्रस्थान गरेका हुन् । उनले भोलि कार्यक्रमलाई सम्बोधन गर्ने कार्यक्रम छ ।
नेपाली प्रतिनिधिमण्डललाई बंगलादेशको हजरत शहाजलाल अन्तर्राष्ट्रिय विमानस्थलमा बंगलादेशका लागि नेपाली राजदूत घनश्याम भण्डारी र बंगलादेशको परराष्ट्र मन्त्रालयका अधिकारीले स्वागत गरेका थिए ।
शुक्रबार नै परराष्ट्रमन्त्रीले आफ्ना बंगलादेशी समकक्षीसँग भर्चुअल भेटवार्ता गरेका थिए जहाँ उनीहरूले व्यापार, पारवहन, ऊर्जा, शिक्षा, लगानी र जनताबीचको सम्बन्धका विषयमा छलफल गरेका थिए।
