काठमाडौं, वैशाख २१ । ८७ मेगावाटको सेती नदी–३ जलविद्युत् आयोजना निर्माण गर्न करिब १७ अर्ब ८९ करोड रुपैयाँ लाग्ने अनुमान गरिएको छ ।
आयोजनाले गरेको सम्भाव्यता सर्वेक्षणमा अर्धजलाशययुक्त जलविद्युत आयोजना निर्माण गर्न आवश्यक पर्ने रकम आएको हो । नेपाल विद्युत प्राधिकरणको सहायक चिलिमे हाइड्रोपावर कम्पनी लिमिटेड आयोजनाको विकासकर्ता हो ।
प्राधिकरणका अनुसार चिलिमे इन्जिनियरिङ एण्ड सर्भिसेज कम्पनी लिमिटेडले आयोजनाको सम्भाव्यता अध्ययन र वातावरणीय प्रभाव मूल्याङ्कन गरी प्रतिवेदन तयार पारेको छ । आयोजनाको प्रति मेगावाट लागत २२ करोड ८५ लाख रुपैयाँ अनुमान गरिएको छ ।
सेती नदी–३ जलविद्युत् आयोजना बझाङ जिल्लाको जयपृथ्वी नगरपालिकाका ६ वडामा विस्तार हुने भएको छ । सम्भाव्यता अध्ययन प्रतिवेदनअनुसार आयोजनाको अधिकतम हेड १२४ दशमलव ४६ मिटर रहने छ भने कुल हेड ११५ दशमलव ७ मिटर रहने छ ।
आयोजना सात वर्षमा सम्पन्न हुने अनुमान गरिएको छ । आयोजनाको आन्तरिक प्रतिफल दर १२० प्रतिशत हुनेछ ।
Published Date: 04 May 2023
