दमौली, वैशाख २० । ट्रकको ठक्करबाट स्थानीयको मृत्यु भएपछि याम्पा आँधीखोलावासीले अवरुद्ध गरेको पृथ्वी राजमार्गको याम्पा–आँबु खैरेनी सडक चार घण्टापछि सञ्चालनमा आएको छ । आक्रोशित स्थानीयले आज राजमार्गको बन्दीपुर गाउँपालिका–५ याम्पा आँधीखोलामा यातायात अवरुद्ध गरेका छन् ।
बिहान १० बजेदेखि अवरुद्ध भएको सडक अहिले सुचारु भएको छ । पीडितका आफन्त, प्रहरी र जनप्रतिनिधिको बैठकले दोषीलाई कारबाही र घाइतेलाई उचित क्षतिपूर्ति दिने सहमति गरेपछि राजमार्ग सञ्चालनमा आएको हो । बैठक सहायक प्रमुख जिल्ला अधिकारी काशीराम गैहरेले बोलाएका हुन् ।
बन्दीपुर गाउँपालिका–५ याम्पा आँधीखोलामा आज बिहान मुग्लिनतर्फ जाँदै गरेको ना ४ ख १९७३ नम्बरको ट्रकले ठक्कर दिँदा ११ जना घाइते भएका छन् । ट्रक चिप्लिएर सडक छेउमा ठोक्किएर सडक छेउमा रहेका पैदलयात्रीलाई घाइते बनाएको गाउँपालिका–५ का वडाध्यक्ष ध्रुवप्रसाद लामिछानेले बताए ।
Published Date: 03 May 2023
