भक्तपुर, साउन २ । नेपालभर विभिन्न स्थानमा ‘कोरा’ आयोजना हुने गरे पनि साइकल कनेक्ट भक्तपुर (Cycle Connect Bhaktapur) द्वारा आयोजना गरिने भक्तपुर कोरा ले छोटो समयमै आफ्नो छुट्टै पहिचान बनाउन सफल भएको छ। यसको मुख्य कारण हो– भक्तपुरकै सम्पदा, संस्कृति, समुदाय र दिगो सहरी विकासको अवधारणालाई केन्द्रमा राखेर स्थानीय स्तरबाट कार्यक्रम सञ्चालन गरिनु।
‘कोरा’ केवल साइकल यात्रा होइन, यो वातावरण संरक्षण, स्वस्थ जीवनशैली, सांस्कृतिक सम्पदाप्रतिको सम्मान र समुदायबीचको सहकार्यको अभियान हो। भक्तपुरमा आयोजना हुने कोराले यी सबै पक्षलाई एकैसाथ जोड्दै आएको छ।
यस वर्ष पनि ‘Pedal and Walk Friendly City’ भन्ने मूल नारासहित आयोजना गरिएको कोरा जात्रा भक्तपुर २०२६ ले भक्तपुरलाई पैदलयात्री र साइकलमैत्री शहर बनाउने अभियानलाई थप बलियो बनाएको छ। कार्यक्रममा भक्तपुरसहित काठमाडौं उपत्यकाका तीनै जिल्ला तथा उपत्यका बाहिरबाट समेत सयौं साइकलयात्रीहरूको सहभागिता रहेको आयोजकले जनाएको छ।
भक्तपुर कोराको सबैभन्दा ठूलो विशेषता यसको सम्पदामैत्री रुट हो। विश्व सम्पदा सूचीमा सूचीकृत भक्तपुर दरबार क्षेत्र, ऐतिहासिक बस्ती, परम्परागत टोल, मठमन्दिर, पोखरी तथा सांस्कृतिक सम्पदालाई जोड्दै साइकल यात्रा गरिने भएकाले सहभागीहरूले एकैसाथ इतिहास, संस्कृति र आधुनिक जीवनशैलीको अनुभव गर्न पाउँछन्। भक्तपुर आफैं नेपालकै ऐतिहासिक तथा सांस्कृतिक रूपमा अत्यन्त महत्वपूर्ण नगर हो।
भक्तपुर कोरा समुदायको सक्रिय सहभागिताले पनि विशेष बनेको छ। स्थानीय युवाहरू, विभिन्न साइकल समूह, स्वयंसेवक, सामाजिक संघसंस्था तथा स्थानीय सरकारको समन्वयमा कार्यक्रम सञ्चालन हुने भएकाले यो केवल एउटा खेलकुद कार्यक्रम नभई सामुदायिक अभियानका रूपमा स्थापित हुँदै गएको छ।
यसका साथै, कार्यक्रममा किड्स कोरा समेत आयोजना गरिनु अर्को आकर्षण हो। बालबालिकालाई सानैदेखि साइकल संस्कृतिसँग जोड्ने, सुरक्षित सडक प्रयोगको अभ्यास गराउने तथा वातावरणप्रति जिम्मेवार नागरिक बनाउन प्रेरित गर्ने उद्देश्यले किड्स कोरालाई पनि विशेष प्राथमिकता दिइएको छ।
भक्तपुर कोराले सम्पदा संरक्षणसँगै पर्यटन प्रवर्द्धनमा समेत योगदान पुर्याइरहेको छ। साइकलमार्फत ऐतिहासिक गल्ली, परम्परागत बस्ती, स्थानीय संस्कृति, कला र खानाको प्रचार–प्रसार हुँदा आन्तरिक तथा बाह्य पर्यटनलाई समेत टेवा पुग्ने विश्वास गरिएको छ।
आयोजकका अनुसार, कोराको उद्देश्य केवल साइकल चलाउनु मात्र होइन, सडक सबैका लागि सुरक्षित बनाउने, पैदलयात्री र साइकलयात्रीमैत्री पूर्वाधारको आवश्यकता उजागर गर्ने, वातावरणीय प्रदूषण न्यूनीकरण गर्ने र स्वस्थ जीवनशैलीलाई प्रोत्साहन गर्ने रहेको छ।
यही कारणले भक्तपुरले आयोजना गर्ने भक्तपुर कोरा अन्य स्थानका कोराभन्दा फरक र विशेष बन्दै गएको छ। यहाँ साइकल केवल यातायातको माध्यम होइन, सम्पदा, संस्कृति, वातावरण र समुदायलाई जोड्ने अभियानका रूपमा अघि बढिरहेको छ। भक्तपुरको ऐतिहासिक पहिचानसँग आधुनिक दिगो सहरी अवधारणालाई जोड्ने प्रयासले भक्तपुर कोरालाई देशकै उदाहरणीय सामुदायिक साइकल उत्सवका रूपमा स्थापित गरिरहेको छ।
