काठमाडौँ, वैशाख २८ । इस्तानबुलबाट काठमाडौं आएको टर्किस एयरलाइन्सको उडान टीके–७२६ मा अवतरणपछि धुवाँ देखिएपछि सोमबार त्रिभुवन अन्तर्राष्ट्रिय विमानस्थलमा यात्रुहरूलाई आकस्मिक रूपमा विमानबाट बाहिर निकालिएको थियो ।
यस घटनाको प्रारम्भिक अनुसन्धानले विमानको हाइड्रोलिक पाइपमा आएको प्राविधिक खराबीका कारण धुवाँ उत्पन्न भएको जनाएको छ ।
विमानको दायाँ मुख्य ल्यान्डिङ गियरको टायरमा आगो लागेको (टायर अन फायर) थियो। उक्त आगो विमानस्थलमा रहेको रेस्क्यू एन्ड फायर फाइटीङ जिभिजनले नियन्त्रणमा लिएको थियो ।
टर्किस एयरलाइन्सका प्रवक्ता यह्या उस्तुनले सामाजिक सञ्जाल एक्समार्फत् दिएको जानकारीमा उद्धार प्रक्रिया सफलतापूर्वक सम्पन्न भएको र घटनामा कुनै यात्रु वा चालक दलका सदस्य घाइते नभएको बताएका छन्।
Published Date: 11 May 2026
