काठमाडौं, माघ ३ । इङग्लिस प्रिमियर लिग(इपिएल) मा आर्सनलले टोटनहम हट्सपरलाई पराजित गरेको छ ।
बिहीवार घरेलु मैदानमा सम्पन्न खेलमा आर्सनलले टोटनहमलाई २-१ गोलले पराजित गरेको हो । घरेलु टोलीको जितमा लियान्ड्रो ट्रोसार्डले १ गोल र अर्को गोल आत्मघाती रहेको थियो । टोटनहमका लागि सन ह्युङ मिनले गोल अग्रता दिलाएका थिए ।
खेलमा अग्रता भने पाहुना टोली टोटनहमले लिएको थियो । टोटनहमका लागि खेलको २५औं मिनेटमा सनले गोल गरेका थिए । खेलको ४०औं मिनेटमा टोटनहमका डोमेनिक सोलांकेको आत्मघाती गोलको सहयोगमा आर्सनलले खेलमा बराबरी गर्यो । खेलको ४४औं मिनेटमा ट्रोससार्डले आर्सनलको लागि निर्णायक गोल गरे ।
जितसँगै २१ खेलमा ४३ अंकका साथ आर्सनल दोस्रो स्थानमा उक्लिएको छ । शीर्षस्थानको लिभरपुल भन्दा आर्सनल ४ अंकले पछि छ । लिभरपुलको २० खेलमा ४७ अंक रहेको छ । पराजित टोटनहम २१ खेलमा २४ अंकका साथ १३औं स्थानमा छ ।
बिहीवार नै सपन्न खेलमा न्युक्यासलले वल्भ्सलाई ३-० ले पराजित गरेको छ । लेस्टर सिटी क्रिस्टल प्यालेससँग २-० ले हार्दा एस्टन भिल्लाले एभर्टनलाई १-० ले पराजित गर्यो ।– एजेन्सी
Published Date: 16 January 2025
