इण्डोनेसिया, मंसिर २४ । इण्डोनेसियाको पश्चिमी जाभामा आएको बाढी र पहिरोमा परी ५ जनाको ज्यान गएको छ । ७ जना बेपत्ता भएका छन् । पश्चिम जाभा प्रान्तमा आएको बाढी र पहिरोले सयौं घर र पूर्वाधारमा क्षति गरेको छ ।
पाँच जनाको शव फेला परेको छ । सात जना बेपत्ता भएको एक अधिकारीले बताए । गत हप्ताको मङ्गलवारदेखि सुरु भएको प्राकृतिक प्रकोपले सुकाबुमी क्षेत्रका ५८९ घरमा क्षति गरेको र १ हजार ४०० बासिन्दालाई विस्थापित गरेको छ । प्रान्तीय विपद् व्यवस्थापन तथा न्यूनीकरण निकायका प्रवक्ता हादी रहमतले विपद्का कारण १० वटा पुल भत्किएकाले बासिन्दाको आवतजावतमा बाधा पुगेको बताए।
बेपत्ता भएका सातमध्ये पाँच जना पहिरोको शिकार भएका छन् । बाँकी दुई जना बेपत्ता हुनुको कारण नखुलेको रहमतले बताए । पाँच पहिरो पीडितको खोजी कार्य प्रभावित क्षेत्रमा केन्द्रित रहेको र अन्य दुईको खोजी कार्य यी क्षेत्रभन्दा बाहिर भएको उनले बताए ।
उनका अनुसार विस्थापितलाई खान, बस्न, औषधी र अन्य अत्यावश्यक वस्तुहरू उपलब्ध गराउन दुईवटा विस्थापन केन्द्र स्थापना गरिएको छ । सिन्ह्वा
