काठमाडौं, साउन १५ । पेरिस ओलम्पिक २०२४ मा प्रतिस्पर्धा गरिरहेका नेपालका ब्याडमिन्टन स्टार प्रिन्स दाहाल लगातार दोस्रो खेलमा पनि पराजित भएका छन् । प्रिन्स आयरल्याण्डका न्यात एन्ग्वेन विरुद्ध सोझो सेटमा पराजित गरेका हुन् ।
लगातारको दोस्रो हारसँगै उनी एक खेल अगाडि नै समुह चरणबाट बाहिरिए । जुनियर विश्व नम्बर एक खेलाडी रहिसकेका प्रिन्सले कुनै पनि समय चुनौती समेत पेश गर्न सकेनन् । २१-७ र २१-५ को सहज नतिजामा उनी पराजित भएका भए ।
दोस्रो पटक ओलम्पिक्स खेलिरहेका न्यात ३५ मिनेटमा नै खेल आफ्नो पक्षमा पारे । उनको यो लगातार दोस्रो जित हो। २४ वर्षीय न्यातले टोकियो ओलम्पिक्समा पनि प्रतिस्पर्धा गरेका थिए । उनीसँग जुनियर ओलम्पिक्स खेलेको अनुभव पनि छ ।
युवा खेलाडी प्रिन्स नेपालबाट ओलम्पिक्समा सहभागी हुने पहिलो ब्याडमिन्टन खेलाडी हुन् । पहिलो खेलमा डेनमार्कका विश्व नम्बर दुई खेलाडी भिक्टर एक्सेल्सनसँग २-० को सेटमा पराजित भएका थिए ।
उनले अब समुहको अन्तिम तथा तेस्रो खेलमा मिसा जिल्बरम्यानको सामना गर्नेछन् । समुह पीमा डेनमार्कका भिक्टर एक्सेल्सन र आयरल्यान्डका न्यात नुयानले दुई खेल खेल्दै दुवै खेल जितिसकेका छन् । प्रत्येक समुहको समुह विजेता मात्र राउन्ड अफ सिक्स्टिनमा पुग्ने नियम रहेको छ ।
यसअघि नेपाललाई प्रतिनिधित्व गर्दै पेरिस पुगेका ६ खेलमा ७ खेलाडी मध्य ४ खेलाडी बाहिरिसकेका छन् । टेबल टेनिसका स्यान्टू श्रेष्ठ, पौडीकी डुवाना लामा, जुडोकी मनिता श्रेष्ठ प्रधान र शूटिंगकी सुस्मिता नेपाल पहिलो चरणबाटै बाहिरिएका हुन् ।
पौडीका एलेक्स शाह र एथलेटिक्सकी सन्तोषी श्रेष्ठले प्रतिस्पर्धा गर्ने भने बाँकी रहेको छ ।
