काठमाडौँ, फागुन ११ । नेपाल युवा संघको आयोजनामा दोस्रो संस्करणको केपी ओली कप फूटबल प्रतियोगिता आज देखि सुरु हुदैँछ । उद्घाटन खेलमा आयोजक केपी ओली एफसी र ए डिभिजन लिग विजेता चर्च ब्वाइज युनाइटेड भिड्ने छन् ।
खेल सातदोबाटो स्थित एन्फा कम्प्लेक्समा दिउसो ३ बजे सुरु हुने छ । खेल अघि १ बजे बाट उद्घाटन समारोह समेत रहेको आयोजकले जनाएको छ ।
यसपटक प्रतियोगितामा १२ टोलीको सहभागिता रहने छ । आयोजक केपी ओली एफसी बाहेक चर्च ब्वाइज युनाइटेड, जावलाखेल युथ क्लब, न्यु रोड टिम, थ्रीस्टार क्लब, त्रिभुवन आर्मी एफसी, नेपाल पुलिस क्लब र मछिन्द्र क्लब सहित भारतका मानेभञ्ज्याङ क्लब एफसी र दिल्ली एफसी प्रतियोगितामा सहभागी रहने छन् ।
मनाङ मर्स्याङ्दी क्लबले सहभागिता नजनाउने भएपछि न्यु रोड टिमले मनाङको स्थान लिने भएको हो ।
प्रतियोगिताका सेमिफाइनल अगाडिका खेलहरु सातदोबाटो स्थित एन्फा कम्प्लेक्समा हुने छन् । सेमिफाइनल र फाइनल दशरथ रंगशालामा हुनेछन् । प्रतियोगिताको फाल्गुन १९ का दिन समापन हुने छ ।
प्रतियोगिताको विजेताले ११ लाख रुपैँया र उपविजेताले ५ लाख रुपैँया प्राप्त गर्नेछन् । प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् । गत वर्ष सम्पन्न भएको केपी ओली कपको पहिलो संस्करणको उपाधि मछिन्द्र क्लबले जितेको थियो ।
Published Date: 23 February 2024
