काठमाडौं, पुस १७ । पर्वतको कुश्मा नगरपालिकाका प्रमुख प्रशासकीय अधिकृत उदयबहादुर पराजुलीसहित चार जनालाई जिल्ला अदालत कास्कीले पुर्पक्षका लागि थुनामा पठाएको छ ।
सहकारी रजिस्ट्रारको कार्यालयमा हुँदा कार्यक्षेत्र विस्तारको नाममा मित्रमिलन सहकारीसँग घुस लिएको आरोपमा पक्राउ परेका पराजुलीलाई मंगलबार अदालतले पुर्पक्षका लागि थुनामा पठाउन आदेश दिएको हो ।
न्यायाधीश ऋषिराम आचार्यको इजालसले पराजुलीसहित सहकारी सञ्चालक बुद्धिसागर पौडेल, राजु बराल र गोपाल खनाललाई थुनामा पठाएको जिल्ला अदालतका सूचना अधिकारी सुरज अधिकारीले जानकारी दिए । पराजुलीमाथि एक करोड २५ लाख रुपैयाँ घुस लिएको आरोप छ । मित्रमिलन सहकारीका अध्यक्ष रमण पौडेलले पराजुलीले १ करोड २५ लाख लिएको र २० लाख फिर्ता गरेको बयान दिएका थिए ।
