काठमाडौं, भदौ २२ । सुन तस्करी प्रकरणमा संलग्न थप एक जना पक्राउ परेका छन् । त्रिभुवन अन्तर्राष्ट्रिय विमानस्थलबाट बरामद भएको ६० किलो सात सय १६ ग्राम सुन प्रकरणमा बाराका शिव कुमार सफरलाई प्रहरीले पक्राउ गरेको हो ।
सुनचाँदी व्यवसायी समिति बाराका अध्यक्ष समेत रहेका सर्राफलाई केन्द्रीय अनुसन्धान ब्यूरो सीआईबीको टोलीले बिहीबार राति पक्राउ गरेको हो । यो प्रकरणमा पूर्वसभामुख कृष्णबहादुर महराका छोरा राहुल पनि पक्राउ परेका छन् ।
गत साउन ३ गते त्रिभुवन अन्तर्राष्ट्रिय विमानस्थलबाट बाहिरिएको सुन राजश्व अनुसन्धान विभागले सिनामंगलबाट बरामद गरेको थियो । उक्त प्रकरणमा हालसम्म पक्राउ पर्नेको संख्या २७ पुगेको प्रहरीले जनाएको छ । ब्रेक सु भनेर तस्करी गरिएको सुन प्रकरणमा चिनियाँ व्यापारी र उनीहरुसँग साँठगाँठ भएका नेपालीहरुलाई पक्राउ गरी प्रहरीले अनुसन्धान जारी राखेको छ ।
Published Date: 08 September 2023
