काठमाडौं, असार ३ । नेपालले आइसिसी एकदिवसीय विश्वकप छनोट अन्तर्गत पहिलो खेलमा घरेलु टोली जिम्बावेविरुद्ध राम्रो सुरुवात गरेको छ । हरारे स्पोर्ट्स क्लबमा टस हारेर पहिला ब्याटिङको निम्तो पाएको नेपालले १० ओभरमा कुनै विकेट नगुमाई ४५ रन बनाएको छ ।
नेपालका ओपनर आसिफ शेख २४ बलमा १ चौकासहित १३ रनमा क्रिजमा छन् । कुशल भुर्तेल ३६ बलमा ६ चौकासहित २९ रनमा क्रिजमा छन् । भुर्तेलले ब्यक्तिगत एक रनमै जीवनदान पाएका थिए । तर उक्त जीवनदानपछि भने कुशलले ६ चौका प्रहार गर्दै नेपाललाई राम्रो योगफलको आधार तय गराएका छन् ।
तर तीव्र गतिका बलर रिचर्डको चौथो ओभरको चौथो बलमा कुशल भुर्तेलले ब्यक्तिगत एक रनमा जीवनदान पाएका थिए । एज लागेको बल फस्ट स्लिपमा सिकन्दर राजाले सहज क्याच छाड्न पुगेका थिए । त्यो समय कुशल १२ बलमा १ रन बनाएर खेलेका थिए । त्यसपछि कुशलले आफ्नो रनको गती बढाएका थिए ।
नेपालले १४ औं बलमा रनको खाता खेलेको थियो । कुशल भुर्तेलले एक रन जोड्दै खाता खेलेका थिए । लगत्तै अर्को बलमा आसिफ शेखले चौकाका साथ आफ्नो ब्यक्तिगत खाता खेलेका थिए । जिम्बावेले सुरुवातमा तेन्डाई चतारा, रिचर्ड न्गारावा र ब्लेसिङ मुर्जाबानी गरि आफ्ना प्रमुख तीन बलरलाई बलिङ गराई सकेको छ ।
