म्याग्दी, वैशाख २७ । म्याग्दीको अन्नपूर्ण हिमालबाट तीन हजार ६०० किलो फोहोर सङ्कलन भएको छ । नेपाली सेनाको नेतृत्वमा सञ्चालित हिमाल सफाइ अभियानअन्तर्गत अन्नपूर्ण हिमाल र आधार शिविरबाट फोहोर संकलन गरिएको हो ।
८ हजार ७१ मिटर अग्लो अन्नपूर्ण हिमाल म्याग्दीको अन्नपूर्ण गाउँपालिका–४ नारच्याङमा पर्दछ । नेपाली सेनाका १० जना र पीक प्रमोशन ट्राभल एजेन्सीका १३ जनाको टोलीले ४८ दिनसम्म पहाड र आधार शिविरमा फोहोर संकलन गरेको थियो ।
सफाइ अभियानको नेतृत्व नेपाली सेनाका मेजर गजेन्द्र देउवाले गरेका थिए । क्याप्टेन भीमबहादुर भुजेलसहितको टोलीले ८ हजार ९१ मिटर अग्लो अन्नपूर्ण चुचुरोमा पुगेर फोहोर जम्मा गरेको थियो ।
संकलन गरिएको फोहोरमा १ हजार २ सय केजी बायोडिग्रेडेबल र २ हजार ४ सय केजी ननबायोडिग्रेडेबल रहेको टोलीले जनाएको छ । नारच्याङको अन्नपूर्ण युथ क्लबका प्रतिनिधिहरुको उपस्थितिमा भुसाकेतमा जैविक फोहोरको व्यवस्थापन गरिएको छ ।
नकुहिने फोहोर प्रभु एयरको हेलिकप्टरमार्फत म्याग्दीको दानामा लगिएको थियो ।
अन्नपूर्ण आधार शिविरबाट दानामा ल्याइएको फोहोरलाई दानाका स्थानीय इन्द्रसिंह शेरचनले ट्रकमा राखेर काठमाडौंस्थित नेपाली सेनाको मुख्यालयमा पठाइएको थियो ।
प्लाष्टिक, टिन, फलाम, सिसालगायत २४ सय किलो फोहोर काठमाडौं पठाइएको थियो ।
पर्वतारोहण अनुमति पाएको ७२ वर्षपछि अन्नपूर्ण हिमाल र त्यसको आधार शिविरमा सरसफाइ गरिएको गाउँ संरक्षण क्षेत्र व्यवस्थापन समिति नारच्याङका अध्यक्ष तेज गुरुङले बताए ।
पर्वतारोही र पदयात्रीको चाप बढेसँगै पहाड र आधार शिविरमा फोहोरको थुप्रो थुप्रिएको छ,’ उनले भने, ‘प्रथम पटक नेपाली सेनाको टोलीले अन्नपूर्ण हिमाल सरसफाइ गरेको हो ।
पोखरा महानगरपालिकाले सफा पहाड अभियानका लागि नेपाली सेनालाई १५ लाख रुपैयाँ सहयोग गरेको थियो । नेपाली सेनाले अन्नपूर्ण हिमाल, सगरमाथा, ल्होत्से र बरुँचे हिमालमा ‘स्वच्छ हिमाल अभियान–२०२३’ सञ्चालन गरेको छ ।
गण्डकी प्रदेशमा अवस्थित ८ हजार मिटर अग्लो धवलागिरी र मनास्लु हिमाल यसअघि सरसफाइ गरिएको थियो । पहाडमा फाल्ने फोहोरले वातावरणीय असन्तुलन र गलत सन्देश गएको भन्दै सेनाले अभियान चलाएको हो ।
सन् २०१९ देखि अभियान थालेको नेपाली सेनाले गत वर्ष सगरमाथा, ल्होत्से, मनास्लु र कञ्चनजङ्घा चुचुरोबाट ७ हजार १५७ किलोग्राम बायोडिग्रेडेबल फोहोर निकालेको थियो ।
