भक्तपुर, साउन ४ । साउन महिनाको पहिलो सोमबारदेखि भक्तपुरस्थित ऐतिहासिक शिलु महादेव मन्दिरको वर्षौंदेखि बन्द रहेको मूलढोका सर्वसाधारण भक्तजनका लागि खुला गरिएको छ।
साउन महिनामा भगवान् शिवप्रति आस्था राख्ने भक्तजनहरूको सहज दर्शन तथा पूजा–आराधनालाई मध्यनजर गर्दै लायकुका स्थानीयको समन्वयमा भक्तपुर नगरपालिका वडा नं २ को पहलमा मन्दिरको मूलढोका आजदेखि सर्वसाधारणका लागि खुला गरिएको हो।
साउन महिनाभर प्रत्येक सोमबार भक्तजनहरूले प्रत्यक्ष रूपमा शिलु महादेवको दर्शन, जलाभिषेक तथा पूजा–आराधना गर्न सक्ने व्यवस्था मिलाइएको समितिले जनाएको छ।
यस विशेष व्यवस्थापनका लागि आवश्यक सहजीकरण गरेकोमा भक्तपुर नगरपालिका वडा नं. २ प्रति लायकु सम्पदा संरक्षण समितिले हार्दिक धन्यवाद व्यक्त गरेको छ।
समितिले सम्पूर्ण शिवभक्त तथा श्रद्धालुहरूलाई साउन महिनाका प्रत्येक सोमबार शिलु महादेव मन्दिरमा उपस्थित भई भगवान् शिलु महादेवको दर्शन तथा पूजा–आराधना गरी पुण्य लाभ लिन आग्रह गरेको छ।
साउन महिना भगवान् शिवको आराधनाका लागि विशेष महत्व बोकेको महिना भएकाले शिलु महादेव मन्दिरमा सोमबारका दिन उल्लेख्य संख्यामा भक्तजनहरूको उपस्थिति रहने अपेक्षा गरिएको छ। वर्षौंदेखि बन्द रहेको मूलढोका पुनः सर्वसाधारणका लागि खुला गरिनु धार्मिक तथा सांस्कृतिक दृष्टिले महत्वपूर्ण कदमका रूपमा हेरिएको छ।
Published Date: 20 July 2026
