काठमाडौं, माघ २१ । आज माघ शुक्ल पञ्चर्मी अर्थात वसन्त पञ्चमी । आजको दिनलाई सरस्वती पूजाको रुपमा समेत धूमधामका साथ मनाइन्छ । हरेक वर्ष माघ शुक्ल पञ्चमीका दिन मनाइने वसन्त पञ्चमी अर्थात सरस्वती पूजा आज विद्याकी अधिष्ठात्री देवी सरस्वतीको पूजा-आराधनासहित वसन्त श्रवण गरेर मनाइँदै छ ।
यो वर्षको वसन्त पञ्चमीका दिन आज बिहान ०७ः५५ बजे नासल चोकमा वसन्त श्रवण गरी मनाइँदै छ । नेपाल पञ्चाङ्ग निर्णायक विकास समितिका अनुसार आज बिहान ०७ः५५ बजे हनुमान ढोकाको नासलचोकमा वसन्त श्रवणको कार्यक्रम राखिएको छ । वसन्त श्रवणमा राष्ट्रपति रामचन्द्र पौडेल सहभागी हुने कार्यक्रम छ ।
आजको दिन काठमाडौं उपत्यकाका डिल्लीबजार, स्वयम्भू, मैतीदेवी, गैरीधारास्थित नील सरस्वती, ललितपुरको लेलेलगायत अन्य जिल्लामा रहेका सरस्वतीका मन्दिरमा आज बिहानैदेखि पूजाआजा गर्न भक्तजन, खासगरी छात्रछात्राको घुइँचो लाग्छ । यसैगरी प्रत्येक वर्ष माघ शुक्ल पञ्चमीकै दिन मनाइने श्री पञ्चमी पर्व अर्थात आज विद्याकी अधिष्ठात्री देवी सरस्वतीको देशभर निष्ठापूर्वक पूजा–आराधना गर्दै मनाइँदैछ ।
चन्द्रमा जस्तो गोरो वर्ण भएकी तथा हातमा वीणा र पुस्तक लिएकी विद्याकी देवी सरस्वतीलाई भक्तजनहरूले भारती, शारदा, हंसवाहिनी, जगन्माता, वागीश्वरी, कौमारी, वरदायिनी, बुद्धिदात्री, ब्रह्मचारिणी, चन्द्रघण्टा र भुवनेश्वरीजस्ता नामले समेत पुकार्छन् ।
