काठमाडौँ, असोज २३ । आफ्नो स्वास्थ्यको हिसाबले सोच्ने हो भने सफा र ताजा मासु खान निकै नै जरुरि छ। दशैँ नजिकिंदै छ। दशैमा मासुको उपभोग हामी धेरै नै गर्छौँ। त्यसैले यो चाडमा पनि स्वस्थ र सफा मासु उपभोग गर्न अतिनै आवश्यक छ।
उपभोक्ताले स्वस्थ मासुका लागि विभिन्न कुरामा ध्यान राख्नुपर्छ।
रङ: ताजा मासु गाढा प्राकृतिक रङको हुनुपर्छ । उदाहरणका लागि राँगा वा खसीको मासु, सुँगुरको मासु र कुखुराको मासु क्रमशः सामान्यतया गाढा रातो, गुलाबी र सेतो रङको हुन्छन् । यद्यपि मासुको रङ रातोको साटो हल्का बैजनी भएमा, अक्सिजनको सम्पर्कमा आएको भन्ने बुझिन्छ । तर यो खतरनाक वा हानिकारक भने हुँदैन ।
गन्ध: यो मासुको ताजापन जाँच गर्ने सबैभन्दा सजिलो तरिका मानिन्छ । ताजा मासुमा कुनै पनि प्रकारको गन्ध हुँदैन । विशेषगरी अनौठो प्रकारको गन्ध त झनै हुँदैन । अनौठो गन्धमा प्रायजसो अमिलो, ब्लिच, अमोनिया वा माछाको जस्तो गन्ध हुनसक्छ ।
स्पर्श: स्पर्श गरेर पनि मासुको गुणस्तर थाहा पाउन सकिन्छ । ताजा मासु छुँदा कडा हुन्छ । मासु ताजा छ कि छैन भनेर औंलाले मासुलाई बिस्तारै थिच्नुपर्छ । यदि मासु ताजा छ भने एकैछिनपछि मासु पुरानै आकारमा फर्किन्छ, मासुमा औंलाको डाम बस्दैन । ताजा मासु होइन भने यसमा औंलाको छाप बस्छ । यदि मासु छुँदा चिप्लो महसुस हुन्छ भने मासु कुहिएको संकेत हो ।
अत्यधिक ‘ड्रप लसको’ जाँच: ड्रप लस भनेको भण्डारण र ह्यान्डलिङको क्रममा गुरुत्वाकर्षणको कारण मासुबाट निस्किएको तरल पादर्थलाई बुझाउँछ । यदि मासुको ड्रप लस अत्यधिक छ भने मासु ताजा छैन भन्ने कुराको संकेत गर्छ ।
