काठमाडौँ, माघ २८ । निर्देशक निश्चल बस्नेतले आफूलाई जबसम्म चित्त बुझ्दैन, तबसम्म आफू निर्देशित फिल्म हलमा नल्याउने बताएका छन् ।
शनिबार बेलुकी फिल्म ‘हात्तीछाप’ हेर्न हलमा पुगेका निश्चलले मिडियासँग कुराकानी गर्दै भने–‘म आफूलाई नै चित्त नवुझेसम्म फिल्म रिलिज गर्दै गर्दिनँ । यसैले, केही नयाँ कुरा त फिल्ममा हुनुपर्छ नै भन्ने मेरो मान्यता छ ।’
निश्चल एक्सन जनराको फिल्म निर्देशन गर्ने तयारीमा छन् । तपाइको एक्सन फिल्म कस्तो बन्छ त भन्ने प्रश्नमा निश्चलले भने–‘मुख्यकुरा त मलाई अहिले लगानी गर्नेहरूलाई नै विश्वास दिलाउन गाह्रो परिरहेको छ । केही नयाँ कुरा सोचेर नै मैले एक्सन फिल्म बनाउने तयारी गरेको हुँ । त्यो मेरो दिमागमा छ ।’
निश्चलले नेपाली फिल्म राजनीतिको वरिपरि घुम्नुको पछाडि देशको अवस्था रहेको बताए । उनले भने–‘मैले दिमाग खराबलाई राजनीतिक फिल्म भनेर बनाएको नै होइन । अहिले पनि म त्यो फिल्म राजनीतिक फिल्म हो भन्दिनँ । किनकी, यसले एक सामान्य युवाको विद्रोहको कथा भनेको हो । जबसम्म देशको राजनीति सही बाटोमा हिँड्दैन, हरेक नेपाली फिल्मको कथाले यसलाई कतै न कतैबाट छोएको नै हुन्छ । चाहे त्यो एक्सन फिल्म होस् या सामाजिक ।’
निश्चलले फिल्म ‘हात्तीछाप’ले आफूलाई मनोरञ्जन दिएको पनि बताए । फिल्मको बारेमा उनले भने–‘यो फिल्मको धेरै दृश्यमा मलाई रमाइलो लाग्यो । फिल्म अझै राम्रो बनाउन सकिन्थ्यो । यो कुरा मैले निर्देशक सिमोस सुनुवारलाई पनि भने । तर, फिल्म हेरुञ्जेल रमाइलो लाग्छ ।’
