काठमाडौँ, भदौ २२ । नेपाल वायुसेवा निगमले साउदी अरबको पश्चिमी सहर दमाममा उडान सुरु गरेको छ । निगमका प्रवक्ता रमेश पौडेलले बिहीबार एक विज्ञप्ति जारी गर्दै साउदीको पश्चिमी सहर दमाममा बुधबारदेखि उडान सुरु गरिएको जनाएको छ । निगमले साउदी अरबको राजधानी रियाद उडान भने बन्द गरेको छ । २०७९ बैशाख ९ गतेदेखि निगमले साउदीको राजधानी रियादमा श्रमबजारलाई लक्षित गर्दै काठमाडौं–रियाद सिधा उडान थालेको थियो ।
निगमका प्रवक्ता पौडेलका अनुसार सातामा दुई वटा उडान हुँदै आएको रियादमा आम्दानी गर्न नसकेपछि बन्द गरिएको हो । प्रवक्ता पौडेलले अहिले सातामा दुई दिन बुधबार र शनिबार काठमाडौंबाट सिधा उडान गर्ने यात्रुको माग बढ्दै गएपछि उडान संख्या थप्ने बताए । निगमले बुधबार राति दमामका लागि पठाएको पहिलो उडानबाट १ सय २६ यात्रु गएका थिए । १ सय ५८ सिट क्षमताको एयरबस ए–३२० ले दमामबाट नेपाल १ सय १७ जना यात्रु ल्याएर फर्केको थियो ।
सातामा दुई दिनमात्रै उडान हुने भएकाले निगमले अहिले चालक तथा क्याबिन क्रूसहित १० जना हाराहारीको बेग्लै सेट काठमाडौंबाट त्यही उडानमा पठाउने गरेको छ ।
Published Date: 08 September 2023
