काठमाडौं, वैशाख ७ । कुमार गजुरेलको डेब्यू निर्देशनमा निर्माण हुने नयाँ नेपाली फिल्म ‘सारथी’ को शुभमुहूर्त गरिएको छ । अक्षय तृतियाको शुभ दिन पारेर सोमवार बिहान भद्रकाली मन्दिरमा शुभमुहूर्त गर्दै फिल्मको यूनिट छायांकनका लागि म्याग्दीको गुर्जा खानी प्रस्थान गरेको हो ।
वैशाख ९ गते बुधवारदेखि यो फिल्मको छायांकन गुर्जा खानी आसपासका सुन्दर स्थानमा करिब ४० दिनको सेड्युलमा गरिने निर्देशक गजुरेल बताउँछन् ।
किम्भे प्रोडक्सन तथा धीरज इन्फिनिटी फिल्म्सको सहकार्यमा निर्माण हुन लागेको यो फिल्मबाट कलाकार उत्तम प्रधान र निरुता सिंहको जोडी करिब दुई दशकपछि पुनः एकसाथ देखिन लागेको छ । जसले दर्शकमाझ उत्सुकता बढाउने विश्वास निर्माण टिमको छ ।
अभिनेत्री सिंह फिल्मको शुभमुहूर्त कार्यक्रममा सहभागी थिइन् भने अभिनेता उत्तम प्रधान वैशाख १५ गतेदेखि छायांकनमा जोडिने तयारीमा छन् ।
यो फिल्ममा उत्तम र निरुतासहित मुकुन्द श्रेष्ठ, सम्रान्त थापा, गिरी विश्वकर्मा, गायत्री जोशी, मदन थापा, मिलन खड्का, रश्मी गुरुङ, तुलसी राई, आशा विश्वकर्मा लगायतका कलाकारको अभिनय रहने छ । सौर्यल थापा निर्माता रहेको फिल्मका कार्यकारी निर्माता रदिप श्रेष्ठ र प्रदिप रायमाझी अनि लाइन प्रोड्युसरमा अमीर केसी र निर्देशक गजुरेल रहेका छन् ।
