काठमाडौं, वैशाख १ । मौसम पूर्वानुमान महाशाखाका अनुसार आज देशका विभिन्न भू-भागमा आंशिकदेखि सामान्य बदली रहनेछ।
विशेषगरी कोशी प्रदेशको पहाडी क्षेत्रसहित देशका हिमाली भू-भागमा दिनभर सामान्य बदली रहने अनुमान गरिएको छ। अन्य पहाडी क्षेत्रमा आंशिक बदली रहनेछ भने तराई क्षेत्रमा मौसम मुख्यतया सफा रहने जनाइएको छ।
महाशाखाका अनुसार हिमाली क्षेत्रका थोरै स्थान तथा कोशी र गण्डकी प्रदेशका पहाडी भू-भागका एक–दुई स्थानमा मेघगर्जन र चट्याङसहित हल्का वर्षा वा हिमपात हुन सक्ने सम्भावना रहेको छ। उच्च पहाडी तथा हिमाली क्षेत्रमा यात्रा गर्नेहरूलाई सतर्क रहन आग्रह गरिएको छ।
रातिको समयमा पनि मौसमको अवस्था झन्डै यस्तै रहने अनुमान गरिएको छ। हिमाली क्षेत्रमा सामान्य बदली, पहाडी क्षेत्रमा आंशिक बदली र तराई क्षेत्रमा मौसम मुख्यतया सफा रहनेछ। साथै कोशी, बागमती, गण्डकी र कर्णाली प्रदेशका हिमाली भू-भागका एक–दुई स्थानमा मेघगर्जनसहित हल्का वर्षा वा हिमपातको सम्भावना रहेको जनाइएको छ।
मौसमविद्हरूले विशेषगरी हिमाली तथा पहाडी क्षेत्रमा चट्याङ र वर्षाका कारण हुन सक्ने जोखिमबाट जोगिन आवश्यक सतर्कता अपनाउन सर्वसाधारणलाई आग्रह गरेका छन् ।
