काठमाडौँ, फागुन २५ । निर्वाचनपछिको पहिलो कारोबार दिन सेयर बजारमा तीव्र उत्साह देखिएको छ। बजार खुलेको मात्र १ मिनेटमै नेप्से परिसूचक ४ प्रतिशतले बढेपछि पहिलो सर्किट ब्रेक लाग्दै सेयर कारोबार २० मिनेटका लागि स्थगित गरिएको हो।
प्रि–ओपन सेसनमै १.६४ प्रतिशतले बढेको नेप्से बजार खुलेसँगै तीव्र गतिमा उकालो लागेको थियो। यसक्रममा सूचक १०८.६० अंकले बढेर २८२१.१० विन्दुमा पुगेपछि स्वचालित रूपमा पहिलो सर्किट ब्रेक लागेको हो।
सो अवधिसम्ममा २३१ वटा कम्पनीका सेयर १ हजार ६६९ पटक कारोबार भएका छन्। कुल १८ करोड ९६ लाख १२ हजार रुपैयाँ बराबरको ३ लाख २९ हजार कित्ता सेयर किनबेच भएको छ।
पहिलो सर्किट ब्रेकपछि सेयर कारोबार २० मिनेटका लागि रोकिएको छ भने बजार पुनः बिहान ११ बजेर २१ मिनेटमा खुल्नेछ।
