काठमाडौँ, पुस २८ । सिन्धुपाल्चोक जिल्लामा अवस्थित आमायाङ्ग्री पछिल्लो समय आन्तरिक तथा बाह्य पर्यटकको आकर्षणको केन्द्र बन्दै गएको छ। काठमाडौँ उपत्यकाबाट नजिकै रहेको यस गन्तव्यले शान्त वातावरण, मनोरम हिमाली दृश्य र प्राकृतिक सौन्दर्यका कारण उत्कृष्ट पदयात्रा स्थलको रूपमा परिचित हुँदै गएको हो।
आमायाङ्ग्रीको चुचुरोबाट लाङटाङ श्रृङ्खला, दोर्जे लाक्पा हिमाल, अन्नपूर्ण, मनास्लु र सगरमाथासमेतको मनमोहक दृश्य अवलोकन गर्न सकिन्छ। यही कारणले गर्दा आमायाङ्ग्री पदयात्रालाई अन्नपूर्ण क्षेत्रको प्रख्यात पुन हिल पदयात्रासँग तुलना गर्न थालिएको छ।
आमायाङ्ग्री पुग्ने पदमार्ग सहज र रमणीय भएकाले नयाँ तथा अनुभवी पदयात्री दुवैका लागि उपयुक्त मानिन्छ। यहाँको प्राकृतिक सौन्दर्य र स्थानीय संस्कृति अनुभव गर्न सकिने भएकाले पर्यटन प्रवर्द्धनसँगै स्थानीय रोजगारी र अर्थतन्त्रमा समेत सकारात्मक प्रभाव पर्ने अपेक्षा गरिएको छ।
