काठमाडौँ, पुस २३ । बलियो प्रतिद्वन्द्वी आर्सनललाई हराउँदै लिभरपुल एफए कपको चौथो चरणमा प्रवेश गरेको छ । आर्सनलको घरेलु मैदान एमिरेट्स स्टेडियममा आइतबार भएको खेलमा लिभरपुलले २-० को जित निकाल्यो ।
प्रिमियर लिगको शीर्ष स्थानमा रहेको लिभरपुलको जितमा लुइस डियाजले एक गोल गरे । अर्को आत्मघाती गोल उपहार रहेको थियो ।
खेलमा पहिलो गोलको लागि ८०औं मिनेटसम्म पर्खिनु परेको थियो । ट्रेन्ट अलेक्जेंडर-आर्नोल्डको फ्रिकिकमा गरेको क्रस क्लियर गर्न खोज्दा आर्सनलका डिफेन्डर जाकुब किविवरले बललाई आफ्नै पोस्टको दिशा दिएका थिए ।
अर्को गोल भने इन्ज्युरी समयको पाँचौं मिनेटमा भएको थियो । डिएगो जोटाको पासमा डियाजले सुन्दर फिनिस गर्दै जित निश्चित गरेका थिए ।
आर्सनलले खेलमा १८ सट प्रहार गरेपनि गोलको खाता खोल्न सकेन । पछिल्ला ७ खेलमा १ मात्र जित निकालेको आर्सनलको यो लगातार तेस्रो हार हो ।
Published Date: 08 January 2024
